9. ԿՈՒՍԱԿՑՈՒԹՅԱՆ ՆԱԽԱԳԱՀԸ

9.1. Կուսակցության նախագահն ընտրվում է համագումարի կողմից` երկու տարի ժամկետով: Կուսակցության նախագահի թեկնածություններն առաջադրվում են համագումարի պատվիրակների կողմից: Կուսակցության նախագահ է ընտրվում գաղտնի քվեարկության արդյունքում համագումարի պատվիրակների առավել ձայներ ստացած թեկնածուն:

9.2. Կուսակցության նախագահը, կուսակցության գործադիր մարմնի անդամների կազմից կուսակցության խորհրդի հաստատմանն է ներկայացնում կուսակցության նախագահի տեղակալների թեկնածությունները: Կուսակցության նախագահի բացակայության դեպքում տեղակալներից մեկը կուսակցության նախագահի հանձնարարությամբ իրականացնում է կուսակցության նախագահի լիազորությունները:

9.3. Կուսակցության նախագահը`

•  ներկայացնում է կուսակցությունը, նրա շահերը և դիրքորոշումը պետական և տեղական ինքնակառավարման մարմինների, հասարակական, քաղաքական և միջազգային կազմակերպությունների հետ ունեցած հարաբերություններում կամ դրա համար լիազորում է կուսակցության այլ անդամների.
•  ի պաշտոնե կուսակցության խորհրդի և գործադիր մարմնի անդամ է.
•  հրավիրում է կուսակցության խորհրդի կամ գործադիր մարմնի նիստ.
•  ղեկավարում է կուսակցության գործադիր մարմնի աշխատանքները և նախագահում կուսակցության խորհրդի նիստերը.
•  տնօրինում է կուսակցության գույքը և դրամական միջոցները.
•  հաստատում է կուսակցության խորհրդի և գործադիր մարմնի որոշումները կուսակցության պաշտոնաթերթի և այլ պարբերականների հրատարակման մասին.
• կազմավորում է իր աշխատակազմը.
• կարող է ստեղծել խորհրդակցական մարմիններ.
•  կուսակցության անունից հաստատում (ստորագրում) է բոլոր անհրաժեշտ փաստաթղթերը.
•  սահմանում է կուսակցության նախագահի տեղակալների կողմից անմիջականորեն համակարգվող ոլորտները.
•  իրականացնում է կուսակցության ընդհանուր ղեկավարումը.
•  կուսակցության խորհրդի հաստատմանն է ներկայացնում կուսակցության գործադիր մարմնի առաջարկները.
•  կուսակցության խորհրդի հաստատմանն է ներկայացնում կուսակցության գործադիր մարմնի հավանությանն արժանացած` Ազգային ժողովում և կառավարությունում քաղաքական պաշտոններում նշանակման կամ ընտրության ներկայացվող ՀՀԿ թեկնածուներին, կուսակցության հանձնաժողովների նախագահների և կառուցվածքային ստորաբաժանումների ղեկավարների թեկնածությունները:

Կուսակցության պաշտոնական դիրքորոշումը արտահայտում են կուսակցության նախագահը, նախագահի տեղակալները և Ազգային ժողովում` ՀՀԿ խմբակցության ղեկավարը:

10. ԿՈՒՍԱԿՑՈՒԹՅԱՆ ԽՈՐՀՈՒՐԴԸ

10.1. Կուսակցության ներկայացուցչական մարմինը կուսակցության խորհուրդն է: Կուսակցության խորհուրդն ընտրվում է կուսակցության համագումարում: Կուսակցության խորհրդի անդամության թեկնածություններն առաջադրվում են համագումարի պատվիրակների կողմից:
Կուսակցության խորհուրդը համարվում է կազմավորված, եթե ընտրված է նրա անդամների առնվազն 2/3-ը:

10.2. Կուսակցության խորհրդում կարող են ընդգրկվել կուսակցության գործադիր մարմնի անդամները, կուսակցության անդամ պատգամավորները և կառավարության անդամները, կուսակցության մարզային խորհուրդների, Երևան քաղաքի տարածքային կազմակերպությունների խորհուրդների նախագահները, կուսակցության կառուցվածքային ստորաբաժանումների ղեկավարները: Կուսակցության խորհրդի անդամների թիվը որոշում է կուսակցության համագումարը: Կուսակցության խորհրդի անդամների ընտրությունը կատարվում է գաղտնի քվեարկությամբ` սույն կանոնադրությամբ սահմանված կարգով: Ընտրված են համարվում համագումարի պատվիրակների առավել կողմ ձայներ ստացած թեկնածուները:

10.3. Կուսակցության խորհրդի նիստերը հրավիրվում են առնվազն չորս ամիսը մեկ անգամ: Կուսակցության նախագահի կամ խորհրդի անդամների առնվազն 1/3-ի նախաձեռնությամբ կարող է հրավիրել արտահերթ նիստ: Նիստն օրինական է, եթե ներկա է խորհրդի անդամների առնվազն 2/3-ը:

10.4. Կուսակցության խորհրդի անդամը կարող է կասեցնել իր գործունեությունը խորհրդում: Կուսակցության խորհրդի անդամի գործունեության կասեցման հարցը կարող է քննարկվել նաև կուսակցության նախագահի կամ խորհրդի անդամների առնվազն 1/3-ի պահանջով: Որոշումը կայացվում է կուսակցության խորհրդի անդամների ձայների առնվազն 2/3-ով, բաց քվեարկությամբ: Կուսակցության խորհուրդն իրավազոր է, եթե պահպանվում է նրա կազմի առնվազն 2/3-ը:

10.5. Կուսակցության խորհուրդը`

• հրավիրում է կուսակցության արտահերթ համագումար.
• վերահսկում է կուսակցության համագումարի հրավիրման նախապատրաստական աշխատանքները.
• վերահսկում է համագումարի և իր որոշումների կատարումը.
• հաստատում է գործադիր մարմնի կողմից մշակված և ներկայացված` կուսակցության գաղափարախոսական հիմնադրույթները, ծրագրային և կանոնադրական փաստաթղթերի նախագծերը, կուսակցության մարտավարական սկզբունքները, կուսակցության անունից անում է հայտարարություններ և առաջարկություններ.
• հաստատում է Ազգային ժողովում ՀՀԿ խմբակցության գործունեության հիմնական ուղղությունները, լսում է գործադիր մարմնի տարեկան հաղորդումը.
• հաստատում է կուսակցության նախագահի կողմից առաջադրված կուսակցության նախագահի տեղակալների, կուսակցության հանձնաժողովների նախագահների և կառուցվածքային ստորաբաժանումների ղեկավարների թեկնածությունները.
• քննարկում է Ազգային ժողովի ընտրություններում կուսակցության գործադիր մարմնի կողմից պատգամավորության թեկնածուների առաջադրումը.
• հաստատում է կուսակցության նախընտրական ծրագիրը.
• հաստատում է կուսակցության գործադիր մարմնի հավանությանն արժանացած` Ազգային ժողովում և կառավարությունում քաղաքական պաշտոններում նշանակման կամ ընտրության ներկայացվող ՀՀԿ թեկնածուներին, կուսակցության հանձնաժողովների նախագահների և կառուցվածքային ստորաբաժանումների ղեկավարների թեկնածությունները.
• անհրաժեշտության դեպքում լսում է կուսակցության մարզային խորհուրդների հաշվետվությունները:

10.6. Կուսակցության խորհուրդը դադարեցնում է իր լիազորությունները հերթական կամ կուսակցության խորհրդի ընտրության օրակարգով հրավիրված արտահերթ համագումարի սկսվելու օրը:

11. ԿՈՒՍԱԿՑՈՒԹՅԱՆ ԳՈՐԾԱԴԻՐ ՄԱՐՄԻՆԸ

11.1. Կուսակցության մշտական գործող ղեկավար մարմինը կուսակցության գործադիր մարմինն է: Այն ընտրվում է կուսակցության համագումարում: Կուսակցության գործադիր մարմնի անդամության թեկնածուներն առաջադրվում են համագումարի պատվիրակների կողմից: Գործադիր մարմնի անդամների թիվը որոշում է համագումարը` նկատի ունենալով առաջիկա ժամանակահատվածում կուսակցության խնդիրները:

 Գործադիր մարմնի անդամների ընտրությունը կատարվում է գաղտնի քվեարկությամբ` սույն կանոնադրությամբ սահմանված կարգով: Ընտրված են համարվում համագումարի պատվիրակների առավել կողմ ձայներ ստացած թեկնածուները:

11.2. Կուսակցության գործադիր մարմինը`

• կատարում է համագումարի և խորհրդի որոշումները.
• քննարկում և լուծում է կուսակցության ընթացիկ գործունեությանն առնչվող խնդիրները.
• մշակում և խորհրդի քննարկմանն է ներկայացնում կուսակցության գաղափարախոսական հիմնադրույթները, կանոնադրական, ծրագրային և կուսակցության ռազմավարությանն առնչվող փաստաթղթերի նախագծերը, ինչպես նաև կուսակցության մարտավարական սկզբունքները.
• վերահսկում է կուսակցության մարզային, տարածքային, սկզբնական կազմակերպությունների և կառուցվածքային ստորաբաժանումների աշխատանքները.
• հավանություն է տալիս Ազգային ժողովում և կառավարությունում քաղաքական պաշտոններում նշանակման կամ ընտրության ներկայացվող ՀՀԿ թեկնածուներին, կուսակցության հանձնաժողովների նախագահների և կառուցվածքային ստորաբաժանումների ղեկավարների թեկնածություններին.
• տարեկան հաղորդում է ներկայացնում կուսակցության խորհրդին` իր գործունեության վերաբերյալ.
• հրավիրում է կուսակցության հերթական համագումար և նախապատրաստում դրա անցկացումը.
• կուսակցության արտահերթ համագումար է հրավիրում կուսակցության նախագահի, խորհրդի, մարզային կազմակերպությունների կեսից ավելիի, իր անդամների կեսից ավելիի առաջարկությամբ.
• որոշում է ընդունում Հանրապետության Նախագահի ընտրություններում ՀՀԿ թեկնածուի առաջադրման վերաբերյալ կամ առաջադրված որևէ թեկնածուին պաշտպանելու մասին.
• որոշում է ընդունում Ազգային ժողովի ընտրություններում պատգամավորության թեկնածուներ առաջադրելու մասին.
• կուսակցության նախագահի առաջարկով որոշում է կայացնում կառուցվածքային ստորաբաժանումների ստեղծման կամ լուծարման մասին և հաստատում է դրանց ղեկավարների թեկնածությունները.
• կուսակցության մարզային խորհրդի առաջարկությամբ կարող է լուծարել կուսակցության տարածքային կազմակերպությունը.
• իր նախաձեռնությամբ և կուսակցության նախագահի համաձայնությամբ կարող է լուծարել կուսակցության մարզային կազմակերպությունը.
• տարեկան մեկ անգամ լսում է կուսակցության մարզային խորհուրդների հաշվետվությունները.
• կուսակցության անունից անում է հայտարարություններ.
• համակարգում և հսկողություն է իրականացնում կուսակցության լրատվամիջոցների և հրատարակչական ծառայությունների գործունեության նկատմամբ.
• իրականացնում է կուսակցության` որպես իրավաբանական անձի, լիազորությունները.
• հաստատում է կուսակցության գույքի կառավարման կարգը և դրամական ծախսերի նախահաշիվը.
• թույլատրում է պատրաստել հուշանվերներ` ՀՀԿ խորհրդանշանի պատկերով:

12. ԿՈՒՍԱԿՑՈՒԹՅԱՆ ՍԵՓԱԿԱՆՈՒԹՅՈՒՆԸ ԵՎ ԴՐԱՄԱԿԱՆ ՄԻՋՈՑՆԵՐԸ

11.1. Կուսակցության սեփականությունը և դրամական միջոցները ձևավորվում և գոյանում են` անդամավճարներից, նվիրատվությունից, օրենքով նախատեսված կարգով բյուջետային ֆինանսավորումից, սահմանված կարգով իրականացված գործունեությունից և օրենքով չարգելված այլ աղբյուրներից, ինչպես նաև քաղաքացիական իրավական գործարքներից և օրենսդրությամբ չարգելված այլ մուտքերից:

11.2. Կուսակցության գույքը և դրամական միջոցները կուսակցության նախագահի կողմից լիազորվելու դեպքում կարող է տնoրինել կուսակցության գործադիր մարմնի անդամներից մեկը` ըստ կուսակցության գործադիր մարմնի կողմից հաստատված նախահաշվի:

• Նախորդ Էջ