Խնդիրները

• Տարածքային կառավարման և տեղական ինքնակառավարման հստակ սահմանազատում:
• Երևան քաղաքում տեղական ինքնակառավարման և կառավարման մարմինների առանձնահատկությունների սահմանում օրենքով և այդ մարմինների ձևավորում:
• Կամայական պաշտոնանկությունից սահմանադրորեն պաշտպանված համայնքի ղեկավարի և ընդլայնված լիազորություններով օժտված ավագանու համագործակցության հակակշիռների ու զսպումների լիարժեք համակարգի ստեղծում` համայնքների արդյունավետ կառավարման նպատակով:
• Միջհամայնքային միավորումների ստեղծում` համայնքների գործունեության արդյունավետության մեծացման նպատակով:
• Համայնքների լիազորությունների լիարժեք կատարումն ապահովող ֆինանսական աղբյուրների սահմանում օրենքով:

Իրավունքի գերակայություն և դատական համակարգ

Իրականացված սահմանադրական փոփոխություններով մարդը, նրա արժանապատվությունը, հիմնական իրավունքներն ու ազատությունները ճանաչվել են որպես բարձրագույն արժեք, ստեղծվել են սահմանադրական երաշխիքներ լիովին անկախ և անաչառ դատական համակարգի ձևավորման համար` որպես պետության նկատմամբ հասարակության վստահության կարևոր նախադրյալ:

Խնդիրները

• Մարդու իրավունքների ապահովման և պաշտպանության օրենսդրական ու կառուցակարգային հիմքերի ամրապնդում:
• Սահմանադրական փոփոխությունների արդյունքում քաղաքացիների՝ Սահմանադրական դատարան դիմելու իրավունքի իրականացման արդյունավետության մեծացմանը նպաստող երաշխիքների ստեղծում:
• Դատական համակարգի կառուցվածքի և գործունեության համապատասխանեցում եվրոպական չափանիշներին:
• Արդարադատության խորհրդի կառուցվածքի և գործունեության համապատասխանեցում սահմանադրական դրույթներին:
• Մարդու իրավունքների եվրոպական դատարան դիմելու հնարավորության իրացման ապահովում` որպես դատական համակարգի անաչառության ապահովման կարևոր գործոն:
• Դատախազության գործունեության սկզբունքների արմատական վերանայում:

Տնտեսություն

2006թ. արդյունքներով Հայաստանի իրական ՀՆԱ-ն 1989թ. մակարդակը գերազանցել է 30%-ով, 2000թ. մակարդակը` 2 անգամ: Արտաքին առևտրաշրջանառության ծավալը 2000թ. համեմատ աճել է 2,7 անգամ, արտահանումը` 3,5 անգամ, իսկ օտարերկրյա ներդրումների ծավալը` շուրջ 2 անգամ:
Էապես կրճատելով ստվերային տնտեսությունը, բարձրացնելով երկրի ներդրումային գրավչությունը, խթանելով արտահանումը, որակապես բարելավելով գիտության և կրթության համակարգերի արդյունավետությունը, պահպանելով տնտեսական աճի բարձր տեմպերը` զգալիորեն մեծացնել պետական բյուջեի սոցիալական ուղղվածությունը:

Խնդիրները

• Առավել բարենպաստ ներդրումային միջավայրի ձևավորում:
• Մրցակցային հավասար և արդարացի պայմանների ապահովում և արհեստական տնտեսական մենաշնորհների առաջացման, մենաշնորհ դիրքի չարաշահումների բացառում:
• Արտահանման ուղղվածություն ունեցող տնտեսության ճյուղերի զարգացման խթանում` բարենպաստ հարկային և մաքսային քաղաքականության իրականացմամբ, ապահովելու համար արտահանման տեմպերի առաջանցիկ աճ ներմուծման նկատմամբ:
• Մարզերում արտադրական ձեռնարկությունների ստեղծման խրախուսում` ներդաշնակ զարգացման նպատակով:
• Երևանի և մյուս խոշոր քաղաքների համար համալիր քաղաքաշինական ծրագրերի մշակում և իրականացում:
• Աղետի գոտում տնտեսության արագ զարգացումը խթանող հստակ ծրագրերի իրագործում:
• Բյուջետային ծախսերի արդյունավետության մեծացում` բարելավելով գնումների գործակալության գործունեության թափանցիկությունը:
• Փոքր և միջին բիզնեսի զարգացման խրախուսում` որպես միջին խավի ձևավորման կարևոր բաղադրիչ:
• Արժեթղթերի երկրորդային շուկայի կայացմանն ուղղված վճռական քայլերի ձեռնարկում` որպես մրցակցային տնտեսության կարևոր բաղադրիչ:
• Համաշխարհային տնտեսությանն ինտեգրման խորացում և միջազգային ու տարածաշրջանային ծրագրերում ընդգրկվածության ընդլայնում:

Արդյունաբերություն

Արդյունաբերական արտադրանքի ծավալը 2000թ. համեմատ աճել է ավելի քան 2 անգամ՝ 300 մլրդ դրամից հասնելով 660 մլրդ դրամի, համախառն ներդրումների ծավալը` 4,5 անգամ (2003թ. համեմատ` 2 անգամ)՝ 192 միլիոն դոլարից հասնելով 820 միլիոնի: Արտահանման ծավալները 2000թ. համեմատ աճել են 3,5 անգամ, 2003թ. համեմատ` 1,5 անգամ՝ 300 միլիոն դոլարից հասնելով 1,044 միլիարդ դոլարի:

Խնդիրները

• Մեծացնել արդյունաբերության տեսակարար կշիռը համախառն ներքին արդյունքում:
• Խրախուսել ներմուծվող ապրանքների փոխարինումը հայաստանյան արտադրանքով:
• Խթանել ներդրումները գիտատար արտադրություններում և նպաստել դրանց զարգացմանը:
• Նպաստել վենչուրային հիմնադրամների կազմավորմանը` արտադրության մեջ ինովացիաների լայնածավալ կիրառումը խթանելու նպատակով:
• Աջակցել ժամանակակից տեխնոլոգիաների ներդրմանը` նպաստավոր հարկային, ֆինանսավարկային և մաքսային քաղաքականության իրականացմամբ:
• Ապահովել գործարարության համաչափ զարգացումը Հայաստանի Հանրապետության ամբողջ տարածքում:

Գյուղատնտեսություն

Գյուղատնտեսական արտադրանքի ծավալը 2000թ. համեմատ աճել է 2 անգամ՝ 280 մլրդ դրամից հասնելով 560 մլրդ դրամի:
«Հազարամյակի մարտահրավերներ» հիմնադրամի հետ իրականացվում է ծրագիր, որի արդյունքում 236 մլն ԱՄՆ դոլար կուղղվի գյուղական ենթակառուցվածքների վերականգնմանը, գյուղերում զբաղվածության խթանմանը:

Խնդիրները

• Գյուղացիական տնտեսությունների համար անհրաժեշտ չափի ոռոգման ջրի անխափան ապահովում:
• Լիակատար աջակցություն գյուղատնտեսական աշխատանքների մեքենայացմանը, գյուղատնտեսական ապրանքների արտադրության ծավալների մեծացման և որակի բարձրացման ջանքերին (որակյալ սերմացուի, բուժանյութերի, տոհմային անասունների ձեռքբերում և այլն):
• Գյուղատնտեսության ոլորտում ապահովագրական համակարգերի ներդրման աջակցություն` զուգակցելով պետական բյուջեից գյուղացիական տնտեսություններին ուղղակի հատկացումների հետ` տարերային աղետների պատճառած վնասները մեղմելու համար:
• Պետական աջակցության մեխանիզմների ստեղծում` գյուղատնտեսական արտադրանքի վերամշակման և պահպանման նպատակով:
• Գյուղատնտեսական մթերքների իրացման շուկաների հետ կապված խնդիրների կարգավորում:
• Գյուղի սոցիալ-կենցաղային պայմանների որակական բարելավում՝ կապի ժամանակակից միջոցների մատչելիություն, բարեկարգ ճանապարհներ, տրանսպորտ, շուրջօրյա խմելու ջուր, գազամատակարարում:

Ենթակառուցվածքներ

Ավտոճանապարհների կառուցման և բարեկարգման համար պետական բյուջեի ծախսերը 2000թ. 6,1 միլիարդ դրամի դիմաց 2006թ. կազմել են 27 միլիարդ դրամ:
Կառուցվել և գործարկվել է Իրան-Հայաստան գազամուղը` Հայաստանի համար ապահովելով էներգետիկ պաշարների այլընտրանքային հնարավորություն:

Խնդիրները

• Տրանսպորտային ենթակառուցվածքների զարգացմանն ուղղված տարածաշրջանային նախաձեռնություններին Հայաստանի մասնակցության ընդլայնում:
• Հայաստանի երկաթուղիների կառավարման մեխանիզմների համապատասխանեցում միջազգային չափանիշներին` երկաթուղային փոխադրումների շահութաբերությունը մեծացնելու նպատակով:
• Հայաստանի քաղաքացիական ավիացիայի ոլորտի բարեփոխումների ավարտում և այլ երկրների հետ Հայաստանի օդային կապի ընդլայնում, «Զվարթնոց» և «Շիրակ» օդանավակայանների տեխնիկական հնարավորությունների ու սպասարկման համապատասխանեցում միջազգային չափանիշներին:
• Էներգետիկ պաշարների ներկրման ուղիների բազմազանության ապահովում:
• Միջպետական և միջմարզային ավտոճանապարհների պահպանման և ներմարզային ճանապարհների վերականգնման և կառուցման ծրագրերի իրականացում:
• Էներգետիկ հզորությունների մեծացում, էներգիայի այլընտրանքային աղբյուրների օգտագործման` հիդրոկայաններից և քամուց ստացվող էլեկտրաէներգիայի արտադրությունների զարգացման խթանում:
• Ջրամբարների հիմնանորոգում, ոռոգման համակարգի լիարժեք գործարկում և զարգացում` գյուղատնտեսության պահանջների լիակատար բավարարման նպատակադրումով:
• Ջրային ռեսուրսների կառավարման ու ջրամատակարարման արդյունավետության շարունակական բարելավում, աջակցություն փոքր հզորության, տեղային ջրամատակարարման համակարգերի ներդրմանը:

Հարկաբյուջետային քաղաքականություն

2000թ. համեմատ պետական բյուջեի ծախսերը դրամական արտահայտությամբ ավելացել են 2,3 անգամ (դոլարային արտահայտությամբ` մոտ 3,5 անգամ), 2003թ. նկատմամբ` 2,4 անգամ:
Պետական եկամուտները 2000թ. համեմատ դրամային արտահայտությամբ աճել են 2,5 անգամ (դոլարային արտահայտությամբ` 3,75 անգամ), 2003թ. համեմատ` 2,25 անգամ:
Վերջին տարիներին պետական բյուջեի ծախսերն իրականացվել են ամբողջությամբ:

Խնդիրները

• Հարկման բեռի արդարացի և համամասնական բաշխում, հարկային և մաքսային օրենսդրության անվերապահ կիրառում բոլոր հարկատուների նկատմամբ:
• Հարկային օրենսդրության և հարկային վարչարարության մեխանիզմների հստակեցում` ապահովելու համար դրանց միանշանակ մեկնաբանությունն ու կիրառումը:
• Կոշտ վերահսկողության սահմանում հարկային պարտավորությունների չկատարման, հակաօրինական գործունեության, ստվերային տնտեսական գործարքների նկատմամբ` կիրառելով խիստ պատժամիջոցներ:
• Բյուջետային մուտքերի մեջ ուղղակի հարկերի տեսակարար կշռի էական մեծացում:
• Հարկային եկամուտների և ՀՆԱ-ի հարաբերակցության զգալի աճի ապահովում` որպես տնտեսության ստվերայնության կրճատման կարևոր գործոն:
• Տարբերակված մեխանիզմների ստեղծում` արտադրական փոքր և միջին ձեռնարկությունների հարկման համար:
• Բյուջետային ծախսերի և պետական այլ ֆինանսական հոսքերի թափանցիկության ու հասարակական վերահսկողության մակարդակի էական մեծացում` պետական գնումների համակարգի գործունեության արդյունավետության բարձրացում:
• Պետության ֆինանսական պարտավորությունների լիարժեք և կայուն կատարում:
• Պետական մարմինների գործունեությունն ապահովող ծախսերի արդյունավետության բարձրացում:

Բանկային համակարգ և ֆինանսավարկային քաղաքականություն

Առևտրային բանկերի տոկոսադրույքները 2001թ. համեմատ կրճատվել են` 27,4%-ից հասնելով 16,6%-ի:
Պետական պարտատոմսերի տոկոսադրույքները 1999թ. համեմատ կրճատվել են ավելի քան 8 անգամ, 2003թ. համեմատ` 2 անգամ, հասնելով 6,3%-ի:

Խնդիրները

• Կենտրոնական բանկի հիմնական խնդրի` գների կայունության ապահովման առավել հուսալի մեխանիզմների կիրառում:
• Բանկերի սեփական միջոցների նկատմամբ նվազագույն պահանջների էական բարձրացում:
• Տնտեսության զարգացման համար անհրաժեշտ երկարատև ներդրումային ռեսուրսների կուտակում:
• Տնտեսության իրական հատվածում բանկային համակարգի մասնակցության զգալի մեծացում:
• Բանկային ավանդների երաշխավորման համակարգի կատարելագործում:
• Վարկային տոկոսադրույքների նվազեցում, հիպոթեքային վարկավորման մատչելիության մեծացում:
• Արժութային շուկայի վերահսկողության մեխանիզմների կատարելագործում:
• Ապահովագրական համակարգի և ոչ բանկային այլ ինստիտուտների` կենսաթոշակային հիմնադրամների, վարկային կազմակերպությունների զարգացման խթանում:
• Կանխիկ դրամաշրջանառության զգալի նվազեցման ծրագրի իրականացում:

Սոցիալական ոլորտ

Երկրի մրցունակության առաջին ցուցանիշը սեփական քաղաքացու համար արժանապատիվ կյանքի պայմանների ստեղծումն է` որպես պետության վերաբերմունքն իր գլխավոր հարստության` մարդու նկատմամբ:
Երկրում 1999թ. համեմատ ծայրահեղ աղքատության մակարդակը կրճատվել է 4,5 անգամ` 21%-ից նվազելով մինչև 4,6%-ի, իսկ աղքատության մակարդակը նվազել է 1,8 անգամ՝ 1999թ. 56%-ից (2003թ. 43%) հասնելով 29,8%-ի:

Սոցիալական ապահովություն

Այս ոլորտում պետական բյուջեի ծախսերը 2000թ. համեմատ աճել են 2,5 անգամ:
Նվազագույն աշխատավարձը 1999թ. համեմատ աճել է 20 անգամ, 2003թ. համեմատ` 4 անգամ՝ հասնելով 20000 դրամի:
Միջին ամսական կենսաթոշակի չափը 2000թ. համեմատ աճել է ավելի քան 3 անգամ, 2003թ. համեմատ` ավելի քան 2 անգամ՝ 4400 դրամից հասնելով13700 դրամի:

Խնդիրները

• Սոցիալական համերաշխություն սերունդների միջև, հասարակության եկամուտների արդարացի և համաչափ բաշխում քաղաքացիների ու սերունդների միջև:
• Տարեցները պետք է ունենան ապահովված ծերություն, երիտասարդները` աջակցություն կյանք մտնելիս, աշխատող մարդը` իր եկամուտներով արժանապատիվ ապրելու հնարավորություն:
• Միջին աշխատավարձի երկու երրորդից ոչ պակաս միջին աշխատանքային թոշակի ապահովման նպատակով կենսաթոշակային կուտակային համակարգի ներդնում:
• Երրորդ և հաջորդ երեխաների ծնունդը խրախուսելու և կենսապայմանների զգալի բարելավում ապահովող ծրագրերի իրագործում:
• Բազմազավակ ընտանիքների միանվագ աջակցության քայլերի զուգակցում կենսապայմանների շարունակական բարելավման ծրագրերի հետ:
• Հաշմանդամների պրոթեզավորման հնարավորությունների և տեղաշարժման լիարժեք պայմանների ապահովում:
• Միայնակ տարեցների և հաշմանդամների սոցիալական սպասարկում տնային պայմաններում:
• Ազատամարտիկների և պատերազմի վետերանների, նրանց ընտանիքների կենսապայմանների բարելավման հատուկ ծրագրերի իրագործում:
• Գործազրկության էական նվազեցման ծրագրերի իրագործում` նոր աշխատատեղերի ստեղծման խրախուսմամբ:
• Պետական բյուջեի սոցիալական ուղղվածության շարունակական խորացում:

Առողջապահություն

Պետական բյուջեի ծախսերն այս ոլորտում 2000թ. համեմատությամբ աճել են մոտ 5 անգամ, 2003թ. համեմատ` մոտ 2,5 անգամ՝ հասնելով 47,6 միլիարդ դրամի:

Խնդիրները

• Հիվանդությունների կանխարգելման համալիր ծրագրի մշակում և իրականացում` որպես առողջապահական խնդիրների լուծման կարևոր գործոն:
• Սոցիալապես անապահով անձանց բժշկական օգնության ու սպասարկման իրականացում բացառապես պետական պատվերի շրջանակներում:
• Գյուղական բնակավայրերի համար առաջնային բուժօգնության լիարժեք պայմանների ապահովում:
• Բուժական հաստատությունների միջև պետական պատվերի տեղաբաշխման և պետական պատվերի հատկացման կոնկրետ սկզբունքների սահմանում:
• Առողջապահության ոլորտում ապահովագրական համակարգի կիրառման լիարժեք հնարավորությունների ապահովում:
• Դեղորայքի օգտագործման անվտանգության ապահովմանն ուղղված արտադրության, ներմուծման և վաճառքի վերահսկողության արդյունավետ համակարգի ստեղծում:
• Առողջապահության ոլորտում կատարվող բուջետային ծախսերի արդյունավետության զգալի մեծացում` բժշկական օգնության նախատեսվող ծավալների, կառուցվածքի և ֆինանսական միջոցների փոխկապակցվածությունն ապահովող կոնկրետ սկզբունքների կիրառման հիման վրա:

Գիտություն

Պետական բյուջեի ծախսերը գիտության և կրթության ոլորտներում 2000թ. համեմատությամբ աճել են ավելի քան 3 անգամ, 2003թ. համեմատ` մոտ 2,6 անգամ՝ հասնելով 92 միլիարդ դրամի:

Խնդիրները

• Առանձին պետական մարմնի ստեղծում` գիտության արդյունավետ կառավարման ու զարգացման նպատակով:
• Գիտության զարգացման մեջ Գիտությունների ազգային ակադեմիայի տեղի ու դերի ճշգրտում:
• Գիտահետազոտական ինստիտուտների մրցունակության ապահովում ու հետագա գործունեության հստակեցում:
• Համալսարանական գիտության զարգացման հնարավորությունների ճշգրտում ու ներդաշնակ համադրում ԳՀ ինստիտուտների հնարավորությունների հետ:
• Հասարակական գիտությունների նկատմամբ առանձնահատուկ ուշադրություն` որպես հասարակական զարգացումների գիտական պլանավորման և իրականացման անհետաձգելի հրամայական:
• Գիտական ծրագրերի և կատարված աշխատանքների արդյունքների գնահատման ժամանակակից մեթոդների կիրառում` ինչպես գիտական աստիճանների շնորհման, այնպես էլ բյուջետային հատկացումների պլանավորման համար:
• Գիտական դպրոցների ձևավորումը խթանող միջոցառումների ծրագրի մշակում և իրագործում:
• Միջազգային գիտական կենտրոնների հետ համագործակցության և ինտեգրացիայի խթանման ծրագրերի մշակում և իրագործում:
• Հայագիտության արդի և հեռանկարային հիմնահարցերի լուծմանն ուղղված գիտական ծրագրերի մշակում և իրագործում:

Կրթություն

Ուսուցիչների աշխատավարձը 2000թ. համեմատ աճել է 6 անգամ, 2003թ. համեմատ` 4 անգամ՝ 12600 դրամից հասնելով 74000 դրամի:

Խնդիրները

• Կրթական բարեփոխումների տարբեր ուղղությունների (նախադպրոցական, հանրակրթական, բուհական) ներդաշնակեցում և ճշգրտում` նպատակ ունենալով ապահովել խոր հանրակրթական ու մասնագիտական գիտելիքներ ունեցող, ժամանակակից մարտահրավերների հաղթահարմանն ունակ, հայրենասեր քաղաքացիների պատրաստմանն ուղղված կրթական համակարգի ձևավորումը:
• Պետական կրթական հաստատությունների համար պահանջվող նորմերը բավարարող շենքային պայմանների ապահովում:
• Պետական կրթական հաստատությունների ուսումնական տեխնիկական հնարավորությունների (գրադարաններ, էլեկտրոնային աղբյուրներ և այլն) նվազագույն անհրաժեշտ պահանջների սահմանում, որը չպետք է զիջի եվրոպական միջին մակարդակը:
• Պետական բարձրագույն ուսումնական հաստատությունների ավարտական վկայականների համատեղելիության ապահովում օտարերկրյա համարժեք վկայականների հետ:
• Մանկավարժների, դաստիարակների և դասախոսների միջին աշխատավարձի ապահովում՝ ոչ պակաս քաղաքացիական ծառայողի միջին աշխատավարձից:
• Հայոց լեզվի պաշտպանության ու զարգացման համալիր ծրագրի մշակում և իրագործում:

Մշակույթ

Պետական բյուջեի ծախսերն այս ոլորտում 2000թ. համեմատությամբ աճել են ավելի քան 4 անգամ՝ կազմելով 15,5 միլիարդ դրամ:

Խնդիրները

• Ազգային պատմամշակութային ժառանգության համապարփակ գույքագրում և դրանց մատչելիության ապահովման, տեղաշարժի վերահսկման և պահպանության ժամանակակից, բարձր հուսալիություն ունեցող համակարգերի ստեղծում:
• Պայքար ցածրորակ մշակույթի կաղապարների դեմ:
• Մշակույթի օջախների դաստիարակչական և ուսուցողական գործառույթների խթանում:
• Մշակութային ժառանգության պահպանմանն ու զարգացմանն ուղղված հասարակական նախաձեռնությունների խրախուսում:
• Պետության կողմից կազմակերպվող մրցանակաբաշխությունների և մրցույթների թվի և որակի էական բարձրացում:
• Մշակույթի զարգացմանն ուղղվող բյուջետային ծախսերը պետք է լինեն առավել արագ աճողը:

Ընտանիք և երիտասարդություն

Ընտանեկան նպաստի չափը 2000թ. համեմատ աճել է 2,8 անգամ, 2003թ. համեմատ` ավելի քան 2,3 անգամ՝ 6400 դրամից հասնելով 17600 դրամի:

Խնդիրները

• Պետության լիարժեք պաշտպանություն ընտանիքին` որպես հասարակության բնական և հիմնական բջիջ:
• Հավասար մեկնարկային հնարավորությունների ապահովում բոլոր երիտասարդների համար` մասնագիտական և հասարակական կյանք մտնելիս:
• Աջակցություն նորաստեղծ ընտանիքներին:
• Բազմանդամ ընտանիքների միանվագ և շարունակական աջակցության զգալի մեծացում:
• Ժողովրդագրական խնդրի լուծման ազգային ծրագրի մշակում և իրագործում:
• Սպորտի և ֆիզիկական կուլտուրայի զարգացմանն ուղղված աջակցության զգալի մեծացում, հատուկ հոգածություն ակնառու նվաճումների հասած մարզիկների նկատմամբ:

Առողջ միջավայր - բնապահպանություն

Սևանա լճի մակարդակն այսօր 1,9 մետրով ավելի բարձր է 1999թ. մակարդակից:

Խնդիրները

Սևանա լճի մակարդակի նվազմանը սպառնացող վտանգի վերացումից հետո երկրի բնապահպանական կարևորագույն խնդիրներն են դարձել`

• Սևանի ավազանի բնապահպանական համալիր խնդրի լուծման ծրագրի մշակումը և իրագործումը,
• երկրի անտառածածկույթի հսկողության, առողջացման և ընդլայնման մեխանիզմների ստեղծումը և ծրագրերի իրականացումը,
• անապատացման դեմ պայքարի համալիր ծրագրի մշակումը և իրագործումը,
• Երևանի և մյուս խոշոր քաղաքների բնապահպանական խնդիրների լուծման ծրագրի իրագործումը:

Ազգային բանակ

Ապահովվել է ռազմական բնագավառում միջազգային համագործակցության ներդաշնակ զարգացում` Հավաքական անվտանգության պայմանագրի կազմակերպության շրջանակներում և ՆԱՏՕ-ի հետ սերտ համագործակցությամբ: Հաստատվել և սկսել է իրագործվել ՆԱՏՕ-ի հետ Անհատական գործընկերության գործողությունների ծրագիրը:

Խնդիրները

• Պետության այնպիսի պաշտպանական ներուժի ապահովում, որն անհրաժեշտ է որևէ ագրեսիայի հակահարված տալու, երկրի ինքնիշխանությունն ու անկախությունը, տարածքային ամբողջականությունը պաշտպանելու համար:
• Բանակի շարունակական համալրում բարձրորակ սպայական կադրերով:
• Պաշտպանական և անվտանգության ոլորտի համակարգային բարեփոխումների արդյունավետության ապահովում:
• Ծառայության սոցիալական պայմանների շարունակական բարելավում:
• Գաղափարական աշխատանքների արդյունավետության բարձրացում:

Արտաքին քաղաքականություն

Խնդիրները

• Եվրոպական ինտեգրացիայի հետագա խորացում, Եվրոպայի խորհրդին անդամակցելիս ստանձնած պարտավորությունների կատարման ավարտ:
• Հավաքական անվտանգության պայմանագրի կազմակերպության շրջանակում համագործակցության խորացում և նպաստում ԱՊՀ շրջանակներում արդյունավետ հարաբերությունների ձևավորմանը:
• Ռուսաստանի հետ կնքված առևտրատնտեսական, ռազմական, էներգետիկ, գիտական, կրթական, մշակութային ոլորտները ներառող պայմանագրերի իրագործման արդյունավետության մեծացում:
• Հայաստան-ԱՄՆ համագործակցության ընդլայնում և խորացում, «Հազարամյակի մարտահրավեր» կորպորացիայի հետ ստորագրված 236 միլիոն դոլար արժողության ծրագրի իրականացում` ուղղված Հայաստանում գյուղական շրջանների ճանապարհների և ոռոգման համակարգի վերականգնմանն ու շինարարությանը, գյուղական արտադրության խթանմանը:
• Եվրոպական միության հետ համագործակցության զարգացման և խորացման ուղղությամբ` Եվրոպական հարևանության քաղաքականության շրջանակներում Հայաստան-Եվրոպական միություն Գործողությունների ծրագրի արդյունավետ իրագործում:
• Հայոց ցեղասպանության միջազգային ճանաչմանն ուղղված ծրագրերի մշակում և իրականացում:
• Արտաքին տնտեսական անվտանգության ամրապնդում, էներգետիկ պաշարների ներկրման հնարավորությունների բազմազանության ապահովում Հայաստան-Իրան գազամուղի լիարժեք գործարկմամբ և զարգացմամբ:
• Տարածաշրջանային համագործակցության խորացման նախաձեռնություն` Վրաստանի և Իրանի հետ հարաբերությունների զարգացման, մյուս հարևանների հետ դրանց կարգավորման ուղղությամբ:
• Չինաստանի հետ համագործակցության խորացում:

Ղարաբաղյան հիմնախնդիր

Վերջին տարիներին հակամարտության կարգավորման գործընթացում արձանագրվել է աննախադեպ տեղաշարժ. ազգերի ինքնորոշման իրավունքը ճանաչվել է որպես Ղարաբաղյան հիմնախնդրի կարգավորման հիմնական սկզբունքներից մեկը, տեղ է գտել ԵԱՀԿ Մինսկի խմբի համանախագահների հրապարակած կարգավորման հիմնական սկզբունքների շարքում և ամրագրվել է միջազգային կազմակերպությունների մի շարք փաստաթղթերում:
Միջազգային չափանիշներին համապատասխանող Սահմանադրության ընդունումը ժողովրդավարական, իրավական, սոցիալական պետություն կառուցելու ԼՂՀ կամքը հաստատող և ճանաչման գործընթացին նպաստող կարևոր գործոն է:

Ղարաբաղյան հիմնախնդրի կարգավորման հարցում ՀՀԿ դիրքորոշումը մշտապես եղել է անսասան`

• Պետք է միջազգայնորեն ճանաչվի Արցախի ժողովրդի ինքնորոշման իրավունքը և պայմաններ ստեղծվեն դրա իրացման համար:
• Պետք է ապահովվի ԼՂՀ բնակչության և սահմանների անվտանգությունը:
• ՀՀ-ն և ԼՂՀ-ն պետք է ունենան ընդհանուր սահման:

Այդ մոտեցումների հիման վրա Ղարաբաղյան խնդրի կարգավորման գործընթացում ՀՀ և ԼՂՀ դիրքերի ամրապնդման համար անհրաժեշտ է`

• իրականացնել բազմակողմանի աջակցություն Լեռնային Ղարաբաղի Հանրապետությանը` ժողովրդավարական բարեփոխումների գործընթացում,
• իրականացնել նմանատիպ հակամարտությունների կարգավորման գործընթացների քաղաքագիտական-իրավական համեմատական ուսումնասիրություն,
• ստեղծել Ղարաբաղյան խնդրի պատմական, մշակութային, իրավական, քաղաքական ասպեկտներին վերաբերող վերլուծական-տեղեկատվական նյութերի հարուստ հավաքածու օտար լեզուներով:

Ազգային միասնություն - Սփյուռք

Դարերի ընթացքում ձևավորված Սփյուռքը ներառում է տարաբնույթ մշակույթ, քաղաքական, տնտեսական համակարգեր ունեցող բազմաթիվ երկրներում ձևավորված, հայության կեսից ավելին կազմող հայ համայնքները: Ազգային միասնության հիմքը Հայաստանի Հանրապետության համապարփակ ջանքերն են հանուն այդ համայնքների ազգային ինքնության պահպանման և համայնքների` քաղաքական, տնտեսական, մշակութային և այլ ոլորտներում ունեցած փորձառության նպաստը Հայրենիքի զորացմանը: Խնդրի լիարժեք լուծման գրավականը հուզական հենք ունեցող հարաբերությունների լրացումն է գործնական խնդիրների ձևակերպումով ու դրանց լուծման կոնկրետ մեխանիզմների ստեղծումով:

Խնդիրները

• Սփյուռքի գործերի առանձին պետական մարմնի ստեղծում:
• Հայաստան-Սփյուռք համաժողովների միջև ընկած ժամանակահատվածում աշխատանքները կազմակերպելու և համաժողովների աշխատանքներն արդյունավետ պլանավորելու նպատակով գործադիր մարմնի ձևավորում` համազգային առաջնահերթությունների հստակեցման և դրանց իրացման հայեցակարգային մոտեցումների մշակման նպատակով:
• Սփյուռքի գիտական, կրթական, մշակութային, տնտեսական և այլ ոլորտներում առկա ներուժի հաշվառում և օգտագործում Հայաստանի զորացման համար:
• Հայաստանյան տարաբնույթ միջոցառումներին Սփյուռքի արդյունավետ ներգրավում:
• Համահայկական երիտասարդական միջազգային հիմնադրամի շրջանակներում նպատակային ծրագրերի մշակում և իրագործում:
• Հատուկ ծրագրերի մշակում այլալեզու և այլադավան հայկական համայնքների հետ աշխատանքի համար:
• Հայրենադարձության ծրագրերի մշակում և իրականացում:

Սպասվող արդյունքներ

Առաջարկվող ծրագրի իրականացումը պետք է ապահովի Հայաստանի անցումը որակապես նոր մակարդակի, որը բնութագրվում է շարունակաբար զարգացող տնտեսությամբ, արդյունավետ կառավարման համակարգով, պաշտպանված, արժանապատիվ ապրող ժողովրդով, կայացած քաղաքացիական հասարակությամբ, որին բնորոշ կլինեն բազմակարծությունը, հանդուրժողականությունը, արդարադատությունը և համերաշխությունը:

Մի քանի հիմնական ցուցանիշների ակնկալվող արդյունքները 2007-2012թթ. ընթացքում`