Լուրեր

Կայացել է հայագիտության հարցերով խորհրդի նիստ

02.10.2012

Վարչապետ Տիգրան Սարգսյանի նախագահությամբ կառավարությունում տեղի է ունեցել հայագիտության հարցերով խորհրդի հերթական նիստը։
Համաձայն հաստատված օրակարգի` ՀՀ Գիտությունների ազգային ակադեմիայի նախագահ Ռադիկ Մարտիրոսյանը զեկուցել է «Հայաստանի Հանրապետության հայագիտության ոլորտի զարգացման 2010-2025 թթ. ռազմավարության» իրականացման ծրագրով նախատեսված միջոցառումների ընթացքի մասին: Նշենք, որ 2012 թ. հունվարի 12-ի նիստում ՀՀ կառավարությունը հավանություն էր տվել հայագիտության զարգացման հայեցակարգին, ոլորտի զարգացման 2012-2025 թթ. ռազմավարությանը և դրա իրականացման միջոցառումների ժամանակացույցին։ Փաստաթղթերի հիմնական նպատակն է պետության և հայ մտավորականության ջանքերով հայագիտությունը վերածել հայության ազգային և մշակութային անվտանգության ապահովման հզոր գործոնի։
Հաջորդիվ ԳԱԱ իսկական անդամ, ակադեմիկոս Յուրի Սուվարյանը ներկայացրել է Հայագիտական ուսումնասիրությունները ֆինանսավորող համահայկական հիմնադրամի ստեղծման հարցը: Նա խոսել է հիմնադրամի գործունեության նպատակների և ուղղությունների մասին` նշելով, որ այն ուղղված է լինելու հայագիտության զարգացմանը նպաստող ծրագրերի մշակմանն ու իրականացմանը: Այս առնչությամբ վարչապետ Սարգսյանը նշել է. «Մենք հաստատել ենք գիտության զարգացման առաջնայնությունները, և հայագիտությունն այդ շարքում առաջնահերթ ֆինանսավորում է ստանում, այդ թվում նաև ակադեմիական համակարգում` ասպիրանտուրայի, գիտական աշխատանքների, հետազոտությունների և ինստիտուտների գործունեության համար: Փորձում ենք հայագիտության զարգացման համար ավելի բարենպաստ պայմաններ ստեղծել»: Այնուհետև ծավալվել է մտքերի փոխանակում, որի ընթացքում խորհրդի անդամներն իրենց տեսակետն են ներկայացրել քննարկվող հարցի վերաբերյալ:
Նիստում արծարծվել են կանոնադրական հարցեր ևս:

← Վերադառնալ ցուցակին