Հայաստանի Հանրապետական կուսակցություն

 ՀՀ ԱԺ նախագահ Գալուստ Սահակյանի որոշմամբ եւ ՀՀ կառավարության նախաձեռնությամբ մայիսի 5-ին՝ ՀՀ Սահմանադրության 70-րդ հոդվածի համաձայն, գումարվել է ԱԺ արտահերթ նիստ:

Ազգային ժողովի որոշմամբ՝ արտահերթ նիստի յուրաքանչյուր օր կգումարվի մեկուկես ժամ տեւողությամբ երեք նիստ: Առաջին ընդմիջման տեւողությունը մեկ ժամ է, երկրորդ ընդմիջմանը՝ կես ժամ:

Այնուհետեւ խորհրդարանը քվեարկությամբ վավերացրել է նախորդ քառօրյա նիստերում քննարկված՝ ՀՀ Նախագահի ներկայացրած ՀՀ կառավարության եւ Վրաստանի կառավարության միջեւ 2014թ. դեկտեմբերի 24–ին Երեւանում ստորագրված «ՀՀ եւ Վրաստանի պետական սահմանի Սադախլո-Բագրատաշեն անցման կետի տարածքում Դեբեդ գետի վրա նոր կամրջի կառուցման վերաբերյալ», 2015 թվականի փետրվարի 5-ին Մոսկվայում ստորագրված «ՀՀ կառավարության եւ Ռուսաստանի Դաշնության կառավարության միջեւ ՀՀ տարածքում ատոմային էլեկտրակայանի շահագործման ժամկետի երկարաձգման աշխատանքների ֆինանսավորման համար ՀՀ կառավարությանը պետական արտահանման վարկ տրամադրելու մասին», 2014 թվականի դեկտեմբերի 20-ին Մոսկվայում ստորագրված «Հայաստանի Հանրապետության կառավարության եւ Ռուսաստանի Դաշնության կառավարության միջեւ hայկական ատոմային էլեկտրակայանի 2-րդ էներգաբլոկի շահագործման ժամկետի երկարաձգման հարցում համագործակցության մասին» համաձայնագրերը:

Խորհրդարանը քվեարկությամբ ընդունել է նաեւ «Անձնական տվյալների պաշտպանության մասին» եւ կից օրենքների նախագծերի փաթեթի երրորդ ընթերցմամբ քննարկումը երկրորդ ընթերցումից հետո 24 ժամվա ընթացքում քննարկելու մասին որոշման նախագիծը:

ՀՀ ֆինանսների նախարարի տեղակալ Վախթանգ Միրումյանն առաջին ընթերցմամբ խորհրդարանի քննարկմանն է ներկայացրել «Եկամտային հարկի մասին» Հայաստանի Հանրապետության օրենքում փոփոխություն եւ լրացում կատարելու մասին» եւ «Շահութահարկի մասին» ՀՀ օրենքում փոփոխություններ եւ լրացումներ կատարելու մասին» օրենքների նախագծերի փաթեթը: Վախթանգ Միրումյանը տեղեկացրել է, որ նախագծով նախատեսվում է 13 տոկոս եկամտային հարկի դրույքաչափ սահմանել այն աշխատողների նկատմամբ, ովքեր իրենց գործատուների հետ կնքած աշխատանքային պայմանագրերով աշխատելու են բացառապես Հայաստանից դուրս: Վերոնշյալը շինարարական աշխատանքներին է վերաբերում:

Փոխնախարարի խոսքով՝ փաթեթի նպատակն է խթանել շինարարական ծառայությունների արտահանումը Հայաստանից՞

Այն գործատուները, ովքեր կունենան նման պայմանագրեր, եւ դրանք հավանություն կարժանանան ՀՀ կառավարության կողմից, նրանց համար շահութահարկի դրույքաչափը կսահմանվի 5 տոկոս:

Հարակից զեկույցում ԱԺ տնտեսական հարցերի մշտական հանձնաժողովի նախագահի տեղակալ Միքայել Մելքումյանը նշել է, որ հանձնաժողովը քննարկել է փաթեթը եւ գաղափարն ընդունվել է բոլորի կողմից: Սակայն դեռեւս կան մտահոգություններ, որոնք, ըստ Միքայել Մելքումյանի, քննարկման կարիք ունեն:

Հիմնական եւ հարակից զեկուցողները պատասխանել են պատգամավորների հարցերին:

Հովհաննես Մարգարյանը ներկայացրել է իր մտահոգություններն ու առաջարկները եւ նշել, որ չկա վիճակագրություն արտագնա աշխատանքով զբաղվողների վերաբերյալ: Մհեր Շահգելդյանն անհրաժեշտ է համարել ուսումնասիրել այս ոլորտում այլ երկրների փորձը: Ըստ նրա, այս փաթեթի ընդունումը կխթանի արտագաղթը: Հրանտ Բագրատյանը քննադատել է իրականացվող հարկային քաղաքականությունը եւ նկատել, որ նախագծով տարբերակում է մտցվում հարկատուների միջեւ՝ կախված նրանց աշխատավայրից, ինչն անընդունելի մոտեցում է տնտեսագիտության տեսանկյունից: Արծվիկ Մինասյանի կարծիքով, ոլորտը կարգավորման կարիք ունի, սակայն պետք է այնպիսի պայմաններ ստեղծվեն, որ դրսում աշխատող քաղաքացին եւս պաշտպանված լինի: Արծվիկ Մինասյանի խոսքով, քննարկվող նախագծով խնդրի մի մասն է լուծվում: Հեղինե Բիշարյանը եւս խոսել է քաղաքացիների պաշտպանությունից, կարծիք հայտնել, որ նախագիծը լրամշակման եւ օրենսդրական այլ փաթեթով համալրվելու կարիք ունի: Արամ Մանուկյանը նախագիծը հեղափոխական համարելով հարկային վարչարարության ոլորտում, նկատել է, որ այն կարող է նպաստել արտագաղթին:

ԱԺ «Ժառանգություն» խմբակցության քարտուղար Թեւան Պողոսյանը ՀՀ կառավարությանն առաջարկել է ետ վերցնել օրենսդրական նախաձեռնությունը եւ, հաշվի առնելով պատգամավորների հնչեցրած դիտողությունները՝ լրամշակել այն:

ՕԵԿ խմբակցության ղեկավար Հեղինե Բիշարյանը, ներկայացնելով խմբակցության տեսակետը, նշել է, որ քննարկումների արդյունքում հասկանալի չի դառնում, թե ինչպիսի ազդեցություն կարող է ունենալ օրենսդրական առաջարկի ընդունումը մեր տնտեսության վրա: Նրա գնահատմամբ՝ կառավարությունը պետք է տեղական արտադրողին խրախուսելու համար քայլեր իրականացնի, որը ՀՀ քաղաքացուն, լավ մասնագետին հնարավորություն կտա ապրել եւ արարել հայրենիքում, ոչ թե արտերկրում: Դեմ լինելով օրինագծերի փաթեթի ընդունմանը՝ տիկին Բիշարյանը հորդորել է կառավարությանն առավել լուրջ ծրագրեր կյանքի կոչել:

ՀՅԴ խմբակցության տեսակետը ներկայացրել է Արծվիկ Մինասյանը: Նա կարեւորել է այն հանգամանքը, որ առաջարկվում է մոդել, որը ՀՀ քաղաքացիներին թույլ կտա օգտվելու օրենքով նախատեսված հնարավորություններից, իսկ կազմակերպություններին՝ օրինականացնելու իրենց գործունեությունը: Դրական համարելով օրենսդրական փաթեթը՝ պարոն Մինասյանը նշել է, որ կառավարության առաջարկը միտված է հիմնական խնդրի լուծմանը, սակայն այն խնդրին ամբողջական լուծում չտվող նախաձեռնություն է: Ամենայն հավանականությամբ՝ ՀՅԴ խմբակցությունը դեմ չի քվեարկի:

ՀԱԿ խմբակցության ղեկավար Լեւոն Զուրաբյանն անդրադարձել է օրենսդրական փաթեթի ընթացակարգային եւ բովանդակային խնդիրներին, ներկայացրել բացթողումները: Նա տեղեկացրել է, որ իրենք մերժում են այս օրենսդրական փաթեթը եւ դեմ են կառավարության՝ օրինագծերը հապշտապ քննարկելու գործելաոճին: Նա կարեւորել է օրինագծերի վերաբերյալ մասնագիտական քննարկումները հանձնաժողովներում: ՀԱԿ-ը դեմ է քվեարկելու:

ԲՀԿ խմբակցության տեսակետը ներկայացնելով՝ Միքայել Մելքումյանը կարծիք է հայտնել, որ պետք է հստակեցվի, թե ինչ շրջանառության մասին է խոսքը, ինչ է շահելու պետական բյուջեն օրինագծերի փաթեթի ընդունումից, ինչ ռիսկեր կան: Նա կարեւորել է բացատրական աշխատանքը արտագնա աշխատանքի մեկնած քաղաքացիների հետ՝ պարզաբանելու, թե որքանով է նրանց առնչվում այս օրենսդրական փոփոխությունը: Նա հորդորել է կառավարությանը շինարարության ոլորտի դինամիկան եւ տրանսֆերտների կառուցվածքը հասկանալու համար ներկայացնել տեղեկատվություն: ԲՀԿ-ն ձեռնպահ է քվեարկելու:

Վարդան Այվազյանը ներկայացրել է ՀՀԿ խմբակցության տեսակետը: Նա ցավով է արձանագրել, որ որոշ պատգամավորներ խեղաթյուրում են օրենսդրական փաթեթի իմաստը: Պարոն Այվազյանն ընդգծել է, որ օրենսդրական առաջարկը չի վերաբերում արտագնա աշխատանքի մեկնողներին, նրանց իրավունքների սահմանափակման խնդիր չկա: Հարկային այն գործակալը, որը կազմակերպում է ՀՀ քաղաքացիների արտագնա աշխատանքը, Հայաստանում պետք է մուծի եկամտահարկ: Անդրադառնալով տարանցիկ երկիր դառնալուն վերաբերող մտահոգություններին՝ պարոն Այվազյանը կարծիք է հայտնել, որ եթե երկիրը շանսեր ունի, ապա պետք է խելամտորեն օգտագործի դրանք: ՀՀԿ ներկայացուցչի խոսքով՝ լավ օրենսդրական փաթեթ է, որին ՀՀԿ-ն կողմ է քվեարկելու:

Եզրափակիչ ելույթներում ԱԺ տնտեսական հարցերի մշտական հանձնաժողովի նախագահի տեղակալ Միքայել Մելքումյանը եւ ՀՀ ֆինանսների նախարարի տեղակալ Վախթանգ Միրումյանն անդրադարձել են պատգամավորների մտահոգություններին եւ առաջարկներին:

Խորհրդարանն առաջին ընթերցման ընթացակարգով քննարկել է «Առեւտրի եւ ծառայությունների մասին» ՀՀ օրենքում լրացում կատարելու մասին» եւ «Առեւտրի եւ ծառայությունների մասին» ՀՀ օրենքում լրացում կատարելու մասին» ՀՀ օրենքում փոփոխություն կատարելու մասին» օրենսդրական փաթեթը, որը ներկայացրել է ՀՀ ֆինանսների նախարարի տեղակալ Վախթանգ Միրումյանը: Կառավարությունն առաջարկում է պարտադիր դրոշմավորման ենթակա բոլոր ապրանքները դրոշմավորելու հնարավորություն ընձեռել նաեւ այդ ապրանքներն արտադրող կամ ներմուծող չհանդիսացող կազմակերպություններին եւ անհատ ձեռնարկատերերին: Առաջարկվում է նաեւ վիտամինները, պատվաստանյութերը, դեղերն ու օծանելիքը երկրորդային շուկայում առանց դրոշմավորման իրացնելու թույլատրելի ժամկետը 2015 թ. ապրիլի 30-ի փոխարեն սահմանել մինչեւ 2015 թ. հունիսի 1-ը:

Հարցի քննարկումը կշարունակվի Ազգային ժողովի մայիսի 6-ի նիստում: