Հայաստանի Հանրապետական կուսակցություն

 Մայիսի 22-ին Հայաստանի հանրապետական կուսակցության Երիտասարդական կազմակերպության և Հայաստանի պետական տնտեսագիտական համալսարանի ՈՒսանողական խորհրդի նախաձեռնությամբ կազմակերպված <<ՀՊՏՀ ուսանողները առաջին գծում>> եռօրյա ծրագրի շրջանականերում շուրջ 50 ուսանողներ ուղևորվեցին Լեռնային Ղարաբաղի Հանրապետության հյուսիսային շրջանի զորամասերից մեկը:
Ծրագրի առջև դրվել են մի շարք խնդիրներ, մասնավորապես` ծանոթացնել ՀՊՏՀ ուսանողներին ՀՀ ԶՈՒ կառուցվածքին և մարտական դիրքերում իրականացվող հերթապահության տարրերին, բարձրացնել նրանց ռազմահայրենասիրական դաստիարակության մակարդակը, զինել դաշտային պայմաններում ավտոնոմ ապրելու և կողմնորոշվելու համար անհրաժեշտ գիտելիքներով ու հմտություններով:
Ինչպես նշեց ՀՊՏՀ ՈՒԽ նախագահ Սերգեյ Խառատյանը, արդեն ավանդույթ դարձած ծրագրի հիմնական նպատակն է բարձրացնել ուսանողության ռազմահայրենասիրական ոգին և ամրապնդել բանակ-ուսանողություն կապը:
Ծրագրի ընթացքում նախատեսված է ճամբարային աշխատանքների իրականացում, այցելություն զորամաս, ծանոթություն զորամասի կառուցվածքին և անձնակազմին, մասնակցություն կրակային պատրաստությանը, այնուհետև մարտական հերթափոխության և մարտական դիրքերում ինժեներական աշխատանքների իրականացում: ՈՒսանողները հնարավորություն կստանան մասնակցել տարատեսակ ուսումնավարժանքների և 3 օր շարունակ բաց երկնքի տակ առավել անմիջականորեն առնչվել զինվորական կյանքին:
Հավելենք, որ ծրագրի ավարտին ՀՊՏՀ ուսանողները զորամասին կհանձնեն մի շարք նվերներ, այդ թվում` հեռուստացույց և հեռադիտակներ: