Հարցազրույցներ

«Նիկոլ Փաշինյանն իրեն քիչ-քիչ Հիսուս է հռչակում, եթե իր բոլոր ասածներին լուրջ վերաբերվեմ՝ կխելագարվեմ». Հայկ Մամիջանյան

05.02.2020

168TV-ի «Ռեվյու» հաղորդման շրջանակում զրուցել ենք ՀՀԿ երիտասարդական կազմակերպության ղեկավար Հայկ Մամիջանյանի հետ

 
– Պարոն Մամիջանյան, Կապանում ասուլիսի ժամանակ Նիկոլ Փաշինյանը խոսեց Արցախի հարցում Սերժ Սարգսյանի թողած ժառանգության մասին՝ կարդալով կայքերից մեկում Մադրիդյան սկզբունքների վերաբերյալ մի հրապարակում, և նշելով, որ, եթե հանրապետականները չեն հերքել, ուրեմն դա է իրականությունը: Ի՞նչ ժառանգություն է թողել Սերժ Սարգսյանը, և ի՞նչ է հիմա մնացել:
 
– Երբ պարոն Փաշինյանը հպարտորեն ասում էր, որ ինքը զրոյական կետից է սկսում բանակցային գործընթացը և այս ողջ ընթացքը տրամադրել է նրան, որպեսզի տեղեկանա գործընթացի փաստերից, դա ծիծաղելի էր: Բայց երբ նախորդ տարվա դեկտեմբերին Բրատիսլավայում հրապարակվեց քիչ թե շատ շոշափելի որևէ դիրքորոշում, որի վերաբերյալ կարելի է խոսել, որովհետև Արցախի բանակցային գործընթացն ամենագաղտնի բանն է, որը կա մեր երկրում, մենք համոզվեցինք նրանում, որ վերադարձել են Սերժ Սարգսյանի թողած կետին՝ փոշիացնելով 2 տարի, և գումարած մեկ կետ՝ կապված Արցախը բանակցային սեղան վերադարձնելու հետ:
 
Ընդ որում՝ վերջերս, այսպես ասած՝ Արցախի գոյություն չունեցող ադրբեջանական համայնքի ներկայացուցչի հանդիպումը ԱՄՆ դեսպանի հետ, որը շատ վտանգավոր զարգացում է, իմ համեստ ենթադրությամբ՝ հենց պարոն Փաշինյանի այդ մոտեցման արձագանքն է: Պարզ է, որ ադրբեջանական կողմը երբեք չի համաձայնելու նրան, որ Արցախը վերադառնա բանակցային սեղան, ենթադրվում է, որ պարոն Փաշինյանը վտանգավոր սխալ է գործում և գնում է այն ճանապարհով, որ Արցախը ներգրավվի բանակցային սեղանին, իսկ Ադրբեջանի կողմից, այսպես կոչված, Արցախի ադրբեջանական համայնքը ներգրավվի: Դա շատ վտանգավոր զարգացում է, դա կլինի մեկ քայլ՝ առաջ, երեք քայլ՝ հետ:
 
Ինչ վերաբերում է առհասարակ բանակցային գործընթացին, փաստացի ադրբեջանական կողմից հաջողվեց այնպես անել, որ 1.5 տարի բացարձակ չքննարկվի հրադադարի ռեժիմի պահպանման վերահսկողական մեխանիզմների ներդրումը:
 
– Վիեննայի և Սանկտ Պետերբուրգի պայմանավորվածությունները հայանպա՞ստ էին:
 
– Ցանկացած պայմանավորվածության մեջ կարելի է գտնել մի կետ, որը կվնասի մեզ կամ այդքան էլ ցանկալի չէ մեզ համար: Փաշինյանը ձգտում է գտնել լուծում, որը ընդունելի կլինի Արցախի, Հայաստանի և Ադրբեջանի ժողովուրդների համար, բայց եթե օրերից մի օր լուծում գտնվի, այն ընդունելի չի լինելու ո՛չ Արցախի, ո՛չ Հայաստանի, ո՛չ Ադրբեջանի ժողովուրդների համար: Համենայնդեպս, այդ փաստաթղթերում կային կետեր, որոնք Հայաստանի համար շատ կարևոր էին, այդ թվում՝ վերհսկողական մեխանիզմները, և այլն:
 
– Վիեննայի և Սանկտ Պետերբուրգի պայմանավորվածություններն ինչո՞ւ դուրս մղվեցին օրակարգից, ինչո՞ւ, երբ Նիկոլ Փաշինյանը խոսեց Սերժ Սարգսյանի թողած ժառանգությունից, չանդրադարձավ դրանց:
 
– Որովհետև մենք ունենք ապաշնորհ մեծամտությամբ և հարցին չտիրապետելու ունակություններով բանակցող կողմ: Նիկոլ Փաշինյանն անխտիր բոլոր հարցերը, այդ թվում՝ Արցախի խնդիրը, փորձում է օգտագործել ներքաղաքական մանր «մուտիտների» մեջ օգտագործելու համար: Եթե մենք պատրաստ ենք եղել որևէ հակահայկական պայմանավորվածության, ինչը ենթադրում է, որ Ադրբեջանի համար լավ տարբերակ է, չէ՞, ինչո՞ւ չեն գնացել այդ պայմանավորվածությանը: Իրենք իրենց երկրի թշնամի՞ն էին:
 
– Նիկոլ Փաշինյանը Կապանում հայտարարեց, որ այս պահին սեղանին դրված ոչ մի թուղթ չկա, թղթի շուրջ չեն բանակցում: Այդ դեպքում՝ Ժնևում արտգործնախարարները 2 օր ինչի՞ շուրջ էին բանակցում, ի՞նչ եք կարծում: Եվ ինչո՞ւ էին ԵԱՀԿ ՄԽ համանախագահները կոչ անում կոնֆիդենցիալությունը պահպանել, եթե դրանք բանակցություններ չեն, և որևէ թուղթ չկա սեղանին:
 
– Երևի Game of thrones-ի շուրջ: Ես ո՞նց կարող եմ մեկնաբանել մի մարդու, որն ասում է՝ 11 ժամ առանց փաստաթղթի բանակցել են: Պարզ չի՞, որ կա փաստաթուղթ, ու պարզ չի՞, որ այն խնդրահարույց կետեր ունի, եթե հանրությանը մինչև հիմա դրա մասին չեն տեղեկացնում: Գիտեք՝ կար մի ավանդույթ, որ բացի նրանից, որ ցանկացած հանդիպման վերաբերյալ պաշտոնական հայտարարություններ էին արվում, նախագահ Սերժ Սարգսյանը ցանկացած բանակցային կարևոր իրադարձությունից հետո գնում էր Արցախ: Դա չգրված ավանդույթ էր:
 
– Նիկոլ Փաշինյանն ասել էր, որ Արցախի ղեկավարությանն ամեն ինչի մասին տեղյակ են պահում:
 
– Նախ՝ ինձ համար դա վերաբերմունքի խնդիր է, երկրորդ՝ նույնիսկ ՀՀ հանրությանը չեն տեղեկացնում, ես խիստ կասկածում եմ, որ արցախյան կողմն իրապես տեղեկացված է դրանից: Իսկ բանակցային գործընթաց, վստահ եմ, որ կա, և կա ինչ-որ փաստաթուղթ:
 
– Մինչ օրս հայտնի չէ՝ հայկական կողմն ունի՞ օրակարգ Արցախի հարցում, թե՞ ոչ: Առհասարակ, առանց օրակարգի՝ որքանո՞վ է արդյունավետ գնալ բանակցությունների, խորհրդակցությունների կամ հանդիպումների:
 
– Օրակարգ կա, վստահ եմ, որ կա նաև ինչ-որ բանակցվող փաստաթուղթ, որովհետև եթե մենք կարող ենք ենթադրել, որ հայկական կողմի որոշ պաշտոնյաներ պարապ են, էն, որ այց է, գնում են, ինչպես մեր պատգամավորական կորպուսի իբր խորհրդարանական դիվանագիտությամբ զբաղվողների մեծ մասը, ապա մնացած դեպքերում, չեմ կարծում՝ էնքան պարապ են, որ ոչնչի շուրջ 11 ժամ բանակցեն:
 
– Բայց Նիկոլ Փաշինյանն ասաց, որ Արցախի հարցում ոչ մի կառավարություն այնքան թափանցիկ չի աշխատել, որքան ներկայիս կառավարությունը:
 
– Նիկոլ Փաշինյանն այնքան բան է ասել: Նիկոլ Փաշինյանն իրեն քիչ-քիչ Հիսուս է հռչակում, եթե իր բոլոր ասածներին լուրջ վերաբերվեմ՝ կխելագարվեմ:
 
– Նա երկրի ղեկավարն է:
 
– Նույնիսկ ձեզ է կարողացել դրանում համոզել: ՀՀ գլուխը նախագահն է: Ես ցավում եմ, որ մեր երկրի նախագահը չի կարողանում իր գործողություններով, հայտարարություններով՝ հիշեցնել դրա մասին:
 
Մանրամասները՝ 168TV-ի տեսանյութում
 
Ռազմիկ Մարտիրոսյան
 
168.am
 
 

← Վերադառնալ ցուցակին