Հայաստանի Հանրապետական կուսակցություն

 Երևանի քաղաքապետ Տարոն Մարգարյանը, Ամանորի և Սուրբ ծննդյան տոներին ընդառաջ, հյուրընկալել է Երևանի քաղաքապետարանի ենթակայության դպրոցների ու նախադպրոցական ուսումնական հաստատությունների մանկավարժների և Երևանի քաղաքապետին կից քաղաքաշինական խորհրդի երիտասարդական հանձնաժողովի անդամներին: Շնորհավորելով Ամանորի և Սուրբ ծննդյան առթիվ՝ քաղաքապետը շնորհակալություն է հայտնել ներկաներին արդյունավետ աշխատանքի ու համագործակցության համար։
<<2012 թվականը հաջողության տարի էր հատկապես կրթական ձեռքբերումների առումով: Մեր երեխաները ձեր բարեխիղճ և անձնվեր աշխատանքի շնորհիվ բարձր պահեցին Երևանի պատիվը միջազգային ամենատարբեր հեղինակավոր մրցույթներում ու օլիմպիադաներում, ինչի համար շնորհակալ ենք թե՛ նրանց և թե՛ ձեզ, սիրելի ուսուցիչներ: Ուզում եմ նաև ընդգծել, որ hանրապետության նախագահի հանձնարարությամբ այս տարի վերջնական լուծում ստացավ ոլորտում առկա ամենակարևոր խնդիրներից մեկը՝ մայրաքաղաքի կրթական հաստատությունների ջեռուցման հարցը։ Մենք այսուհետ ևս անելու ենք ամեն հնարավորը, որ հատկապես կրթության ոլորտում ձեռքբերումները լինեն շարունակական>>,- ողջույնի խոսքում նշել է քաղաքապետը։
Կրթության ոլորտում ներդրած ավանդի և բարեխիղճ աշխատանքի համար քաղաքապետի Ոսկե մեդալով են պարգևատրվել Երևանի թիվ 133 դպրոցի դասվար Սոֆյա Ղուկասյանը, թիվ 42 մանկապարտեզի փոխտնօրեն Ջուլիետա Թահիանոսյանը և թիվ 133 դպրոցի պատմության ուսուցչուհի Սուսաննա Խալաթյանը։
Երևանի քաղաքապետ Տարոն Մարգարյանը պատվոգրեր և շնորհակալագրեր է հանձնել նաև 34 մանկավարժների, ովքեր տարբեր մրցույթներում հաղթանակած աշակերտների ուսուցիչներ են, ընթացիկ տարվա լավագույն ցուցանիշներով մանկապարտեզների դաստիարակներ, օրինակելի դասերի հեղինակներ:
Հանդիպման ընթացքում մանկավարժներն իրենց հերթին շնորհակալություն են հայտնել ոլորտին ուղղված մեծ ուշադրության ու տարիներ տևած մի շարք խնդիրների լուծում տալու, ինչպես նաև իրենց աշխատանքը բարձր գնահատելու համար։