Հայաստանի Հանրապետական կուսակցություն

 Գարնանային առաջին օրը երիտասարդ ՀՀԿ-ականները դիմավորեցին բավականին արդի` << Ինստիտուցիոնալ/սահմանադրական/ բարեփոխումները ՀՀ-ում. Բարեփոխումներ կառավարման համակարգում>> թեմայով սեմինարին ակտիվ մասնակցություն ցուցաբերելով: Սեմինարը կազմակերպվել էր ՀՀԿ երիտասարդական կազմակերպության և Կոնրադ Ադենաուեր գերմանական հիմնադրամի համատեղ նախաձեռնությամբ: Բանախոսներն էին` Գերմանիայի միջազգային համագործակցության ընկերության իրավական բաժնի ղեկավար Վարդան Պողոսյանը և Ազգային ժողովի աշխատակազմի ղեկավար Հրայր Թովմասյանը:
Սեմինարի ընթացքում նախ և առաջ ներկայացվեց Սահմանադրության էությունը, ծագման պատմությունը, խնդիրներն ու նպատակները, կառավարման համակարգը, խոսվեց սահմանադրական բարեփոխումների ու կառավարման համակարգում բարեփոխումների իրականացման կարգի, դրանց անհրաժեշտության և առաջիկայի համար նախատեսված բարեփոխումների հնարավորությունների մասին:
Այնուհետև հարց ու պատասխանի, ինչ-որ չափ նաև բանավեճի արդյունքում երիտասարդները ստացան իրենց հետաքրքրող հարցերի պատասխանները,լրացրին թեմայի շուրջ ունեցած ինֆորմացիայի բացը, հասկացան գործող մեխանիզմի էությունը:
Հավելենք, որ նման սեմինարները կրելու են շարունակական բնույթ` առավել լայն շրջանակների անհրաժեշտ թեմատիկ ինֆորմացիա հաղորդելու համար: