Հայաստանի Հանրապետական կուսակցություն

 Հոկտեմբերի 2-4-ը Ծաղկաձորում կայացավ Հայաստանի հանրապետական կուսակցության Երիտասարդական կազմակերպության (ԵԿ) հավաքը, որին մասնակցում էին ՀՀԿ ԵԿ տարածքային ստորաբաժանումների պատասխանատուները՝ մոտ 140 պատվիրակ։ Վերջիններս ներկայացրին տարեկան հաշվետվություններ 2014-2015թթ. գործունեության վերաբերյալ:

ՀՀԿ ԵԿ ղեկավար, ՀՀ ԱԺ պատգամավոր Կարեն Ավագյանը նշում է, որ տարեկան հաշվետվությունների ներկայացումն ու քննարկումը լավագույն ձևն է կառույցների ակտիվությունը, գործունեությունը ստուգելու, խնդիրները վեր հանելու համար։ Հավաքի բացման խոսքում ՀՀԿ ԵԿ ղեկավարն անդրադարձավ ՀՀԿ ԵԿ առաքելությանը, ինչպես նաև՝ հավաքի բուն նպատակին։

«Մարզերի տարածքային կազմակերպությունները և Երևանի խորհուրդը մեր հենասյուներն են, որտեղ հավաքվում են երիտասարդներ, ովքեր ասելիք ունեն: Ակտիվ, խելացի, նվիրված և ազնիվ մարդը միշտ տեղ ունի մեր շարքերում: Մեզ համար շատ կարևոր է Երիտասարդական կազմակերպության առողջ լինելը, և այս հավաքի ամբողջ գաղափարախոսությունն է պարզել, թե որքանով է առողջ մեր ԵԿ-ն, որքանով է մրցունակ և ինչպես է նոր մարտահրավերներին դիմակայելու,- նշեց ՀՀԿ ԵԿ ղեկավար Կարեն Ավագյանը: Նա ընդգծեց, որ անցնող տարում փոխվել են շեշտադրումները՝ մեծացել է մարզեր ուղղորդվող միջոցառումների թիվը, և այս գործընթացը շարունակական է լինելու։

Այնուհետև անցում կատարվեց հաշվետվությունների ներկայացմանը, որի ժամանակ ՀՀԿ ԵԿ մարզային, Երևանի տարածքային և ՀՀԿ ԵԿ խորհրդի հանձնաժողովները խոսեցին իրենց գործունեության, ձեռքբերումների, իրականացրած ծրագրերի և միջոցառումների մասին, ներկայացրին այն խնդիրները, որոնք եղել են կառույցներում և լուծում են ստացել կամ առկա են ու դեռ լուծման կարիք ունեն: Հատուկ ընդգծվեցին Երիտասարդական կազմակերպության հաջողությունները միջազգային համագործակցության ոլորտում, անդամակցությունները մի շարք եվրոպական քաղաքական, ուսանողական կառույցներին։

Հաշվետվությունների բուն հատվածի ներկայացմանը հաջորդեցին հարցերն ու պատասխանները, կատարվեցին առաջարկներ խնդիրների համատեղ լուծման, թերությունների շտկման և հետագա արդյունավետ աշխատանքի համար: