Լուրեր
Արմեն Աշոտյանի գործով դատական նիստը բավականին աշխույժ է անցնում․ Տիգրան Աբրահամյան
19.12.2023
ԱԺ «Պատիվ ունեմ» խմբակցության քարտուղար Տիգրան Աբրահամյանը ֆեյսբուքյան իր էջում գրել է․
«Արմեն Աշոտյանի գործով դատական նիստը բավականին աշխույժ է անցնում` մի կողմից իշխանության գործադրած բութ գործիքակազմն է, մյուս կողմից Արմենի փաստարկված խոսքը` համեմված ինտելեկտուալ հումորով ու իրավական ապտակներով:
Արմենն այսօր նոր տերմինաբանություն ներմուծեց դաշտ, որը շատ հստակ բնութագրում է դատաիրավական համակարգի ողջ մերկությունը:
«Սարքելու ինդուստրիա», «սարքելու հոսքագիծ», վերջերս մոդայիկ դարձած խաչմերում բառը, բայց այս դեպքում ոչ թե խաղաղության, այլ արդարության:
Սրանք ձևակերպումներ են, որոնք բնութագրում են իշխանության մղումները` քննչական, դատախազական, դատական համակարգերից մինչև քաղաքական որոշումներ կայացնող կենտրոններ:
Արմենը նաև հիշեցրեց տխրահռչակի վերջին «կռուտիտը»` մենք դատարանի դռները մի քանի ժամով փակել էինք՝ արդարադատության դռները բացելու համար:
Սա պարզ լեզվով ասած նշանակում է, որ իշխանությունը թքած ունի օրենքի և Սահմանադրության վրա ու քաղաքական խնդիրներ լուծելիս առաջնորդվում է նեղ անձնական ցանկություններով, քմահաճույքներով և ֆանտազիաներով:
Ազատությո՛ւն Արմեն Աշոտյանին և մեր մյուս քաղբանտարկյալներին»: